Croeso i Gynlluniau Dŵr Cymru – yma fe ffeindiwch chi bopeth y mae angen ei wybod am ein cynlluniau ar gyfer 2025 a hyd at 2030.
Ac fe welwch chi esiamplau o’r prosiectau yn eich cymuned wrth iddynt ddatblygu hefyd.
Mae Cynllun Busnes Dŵr Cymru’n gam mawr i fyny mewn buddsoddiad dros y 5 mlynedd nesaf. Yn ogystal â’r amcanion sy’n bwysig i’r busnes, mae’n adlewyrchu’r gwelliannau y mae ein cwsmeriaid am eu gweld hefyd.
Mae Cynllun Busnes 2025-2030 yn amlinellu ein hymrwymiad i gyflawni mwy o fuddsoddiad nag erioed, a fydd yn caniatáu i ni wneud gwelliannau sylweddol i’r gwasanaethau a ddarparwn ar gyfer ein 3 miliwn o gwsmeriaid ar draws Cymru a rhannau o Loegr.
Yn Dŵr Cymru, mae ein cwsmeriaid a’n cymunedau wrth galon popeth a wnawn. Cliciwch yma i weld y map rhyngweithiol a fydd yn eich helpu chi i weld y cynlluniau a’r prosiectau sydd ar droed yn eich cymuned.
Gwybodaeth ddiweddar
Buddsoddiad a pherfformiad Dŵr Cymru: Ebrill i Fedi 2025
Cyhoeddwyd ein canlyniadau canol blwyddyn yn ddiweddar, a oedd yn dangos buddsoddiad o £650m yn 2025/26, sef blwyddyn gyntaf ein cynllun buddsoddi 5-mlynedd. Rhwng 2025 a 2030, byddwn ni’n buddsoddi cyfanswm o dros £4bn, gyda £2.5bn o hynny’n cael ei fuddsoddi yn yr amgylchedd.
Bydd yr arian yn dod â gwelliannau i gwsmeriaid, cymunedau a’r amgylchedd, fel y gwlyptir gorlif storm £13 miliwn a agorwyd yn ddiweddar ym Mhont-y-felin, Torfaen – y cyntaf o’i fath yn y DU. Trwy ddefnyddio grym hidlo naturiol gwlyptiroedd, mae’r safle eisoes yn lleihau effaith y cwmni ar afonydd lleol ac mae’n fodel ar gyfer buddsoddiad cynaliadwy pellach yn y dyfodol.
Rydyn ni wedi lansio ymgynghoriadau ar y prosiect seilwaith mwyaf yn hanes y cwmni hefyd – sef Strategaeth Cyflenwi Dŵr Cwm Taf. Bydd y cynlluniau’n moderneiddio’r rhwydwaith dŵr yfed ar draws y de trwy ddisodli cyfleusterau trin canrif oed, a chynyddu’r capasiti ar gyfer storio dŵr glân.
Rhwng Ebrill a Medi 2025, arweiniodd ein buddsoddiad at gynnydd wrth leihau digwyddiadau o lifogydd mewnol ac allanol, gan wella ansawdd dŵr afonol a digwyddiadau llygru drwyddi draw.
Mae’r Asesiad o Berfformiad Amgylcheddol yn dal i fod ar lefel dwy seren, ond nodwyd gwelliannau mewn pedair o’r saith elfen sy’n mesur perfformiad yn y flwyddyn ddiwethaf, a gwelodd y cwmni’r nifer isaf ond un o ddigwyddiadau llygru ar draws y diwydiant.
Diolch i reolaeth ofalus ar gyflenwadau dŵr yn ystod y cyfnodau sych dros y gwanwyn a’r haf, nid oedd angen cyfyngiadau dros dro na ‘gwaharddiadau ar bibellau dyfrio’ ar draws ein hardal weithredu – yn wahanol i sawl rhan o Loegr.
Bydd y buddsoddiadau a amlinellwyd yn gwella ein gwasanaethau ar gyfer cwsmeriaid a’r amgylchedd trwy gyflymu buddsoddiad a gosod ffocws ar ganlyniadau o ran perfformiad ar draws ein hardal weithredu.
Gwlyptir gorlif storm £13 miliwn ym Mhont-y-felin, Torfaen
