Gwella ein Gwasanaethau

Mae dŵr yfed  diogel o safon uchel at ddibenion yfed ac at ddefnyddiau domestig neu fusnes yn hanfodol ar gyfer bywyd pob dydd ac yn rhan greiddiol o’n cenhadaeth. Rydyn ni’n arddel dull ‘o’r tarddle i’r tap’ er mwyn sicrhau bod ein dŵr tap o’r safon uchaf bob un dydd, sy’n cwmpasu popeth o’r tir uchel lle mae’r glaw yn disgyn, i’r pibellau sy’n cludo’r dŵr i eiddo cwsmeriaid.

Mae diogelwch ac ansawdd dŵr yn cael ei fonitro’n ofalus a’i orfodi gan yr Arolygiaeth Dŵr Yfed (DWI) fel y gall cwsmeriaid ymddiried yn llwyr yn y dŵr sy’n dod allan o’r tap .

Er mwyn helpu i sicrhau ansawdd dŵr yfed, byddwn ni’n taclo:

Dibynadwyedd: Dylai cwsmeriaid fod yn gallu dibynnu ar y ffaith fod dŵr ar gael iddynt pryd bynnag y bo angen, nawr ac yn y dyfodol. Mae toriadau tymor byr mewn cyflenwadau yn gallu achosi anghfleustra difrifol pan fyddant yn codi. Pan fo prif bibellau’n byrstio gan effeithio ar gwsmeriaid, rydyn ni’n gweithio’n galed i adfer cyflenwadau dŵr cwsmeriaid cyn gynted â phosibl, ac yn rhyddhau dŵr potel a’i gludo i gartrefi cwsmeriaid bregus.

Afliwiad: Mae ein perfformiad o ran digwyddiadau o  ddŵr tap afliw yn parhau i fod yn her. Yn gyfrannol, rydyn ni’n cael mwy o gysylltiadau gan gwsmeriaid ar y mater yma na chwmnïau eraill. Mae hi’n fater cymhleth sy’n gysylltiedig ag ansawdd newidiol y dŵr crai yn ein cronfeydd, llif uchel yn y rhwydwaith mewn cyfnodau sych, ac adwaith cyfansoddion yn y dŵr â deunyddiau’r pibellau. Ni fydd gwelliannau parhaus yn bosibl heb gyflymu’r gwaith o ddisodli hen brif bibellau dŵr haearn bwrw. Byddwn ni’n buddsoddi £150 miliwn i ddisodli tua 100 cilomedr o brif bibellau haearn bwrw â phibellau o ddeunydd modern.

Plwm: Mae’r pibellau cyflenwi dŵr ar dir y cwsmeriaid, sy’n eiddo i’r cwsmeriaid eu hunain, yn effeithio ar ansawdd y dŵr tap hefyd. Er nad y cwmni dŵr sy’n gyfrifol am y rhain, mae gennym ni’r arbenigedd a’r gallu i gynnal ymdrech i fynd i’r afael ag etifeddiaeth niweidiol pibellau cyflenwi a wnaed o blwm. Yn 2025-2030, byddwn ni’n parhau i ddisodli pibellau cyflenwi plwm cwsmeriaid am ddim.

Mae cynnal ac uwchraddio ein seilwaith yn hanfodol bwysig er mwyn i ni wella’r gwasanaeth a ddarparwn ar gyfer ein cwsmeriaid a diogelu’r amgylchedd.

Dyna pam ein bod ni’n buddsoddi yn ein rhwydwaith dŵr yfed fel y gallwn gyflawni gwelliannau allweddol o ran ein perfformiad ar ollyngiadau, toriadau mewn cyflenwadau dŵr ac ansawdd dŵr yfed.

Rydyn ni wedi clustnodi lleoliadau lle mae angen uwchraddio’r rhwydwaith dŵr, ac mae gennym raglen o waith ar droed yn ardaloedd trefol a gwledig Sir Fynwy, Caerdydd, Llys-wen ger Aberhonddu, a Rasa ger Glynebwy. Mae’r rhaglen ar fin symud ymlaen i Fro Morgannwg, y Barri a Gorllewin Casnewydd.

Caiff gwaith ei gyflawni hefyd ar y prif bibellau dŵr o sment asbestos sy’n heneiddio, yn arbennig yn y gorllewin.

Yn rhan o’n gwaith i wella ansawdd dŵr afonol, rydyn ni wedi buddsoddi mewn gwaith i uwchraddio’r gweithfeydd trin dŵr gwastraff  ar draws ein hardal.

Mae’r rhaglen gynhwysfawr yma eisoes yn lleihau lefelau’r ffosfforws sy’n cael eu rhyddhau o’n safleoedd i’n hafonydd.

Mae newid hinsawdd yn ffactor arall sydd wrth galon ein buddsoddiad mewn diogelwch argaeau, am fod dwyster y stormydd a’r glawiad bellach yn golygu bod angen i ni uwchraddio’r asedau pwysig yma fel y gallant ymdopi ag amodau gweithredu mwy ymestynnol.

Nod popeth a wnawn yw sicrhau ansawdd ein gwasanaethau i gwsmeriaid ac atal niwed i’r amgylchedd. Pan fo pethau’n mynd o chwith, ein nod yw ymadfer yn gyflym ac unioni pethau. Mae gwytnwch ein gweithgareddau gweithredol yn hanfodol bwysig, yn yr un modd â’n gwytnwch ariannol a chorfforaethol. Rydyn ni’n poeni mwyfwy am atal a chynllunio ar gyfer bygythiadau tebygolrwydd isel ag effaith uchel, yn arbennig lle bo lefelau’r risg yn cynyddu dros amser.

Llifogydd: Mae ein cynllun ar gyfer 2025-30 yn rhan o raglen hirdymor i reoli’r risgiau hyn a chynnal ein gwytnwch, gyda ffocws penodol ar addasu at hinsawdd sy’n newid. Rydyn ni wedi gweld nifer o ddigwyddiadau difrifol o lifogydd yng Nghymru dros yr ychydig flynyddoedd diwethaf, yn nodedig Storm Dennis yn Chwefror 2020 a Storm Christoph yn Ionawr 2021, ac yn fwy diweddar Stormydd Bert a Darragh yn 2024. Fe lwyddon ni i leihau’r effaith ar wasanaethau ar gyfer cwsmeriaid, a byddwn ni’n buddsoddi £5 miliwn cyn 2030 er mwyn amddiffyn gweithfeydd trin dŵr allweddol rhag llifogydd, ac yn cychwyn rhaglen tymor hwy i amddiffyn gweithfeydd trin dŵr gwastraff rhag llifogydd y tu hwnt i 2030.

Bygythiad arall sydd ar dwf yw ymosodiadau seiberddiogelwch. Fel Gweithredwr Gwasanaethau Hanfodol mae gofyn i ni fodloni’r rheoliadau diweddaraf ar seiberddiogelwch. Byddwn ni’n parhau i fuddsoddi er mwyn rheoli’r risg ac amddiffyn data cwsmeriaid. Byddwn ni’n gwella ein gallu i ganfod ac ymateb i fygythiadau, gan ryddhau £11 miliwn i gyfoethogi mesurau diogelwch rhag seiberymosodiadau.